德国战车如今陷入困境。
拿夫需要尽快带领球队重返正轨。 喺今年夏天兵败俄罗斯世界杯之后，好多球迷都话德国今铺喺分组赛就濑咗嘢更多系纯属意外。但当德国喺今日凌晨嘅欧洲国家联赛中惨吞荷兰三蛋后，外界终于开始感受到德国战车「慢驶」确实系有「内部零件问题」。
凭藉云迪克、迪比和韦拿度姆喺上下半场嘅3个入球，荷兰喺同德国上演嘅呢场欧洲国家联赛分组赛焦点战中轻松笑到最后。无可否认嘅系，近年一再沉沦嘅荷兰如今已经逐渐恢复元气，不过莫讲话法国，今时今日嘅荷兰距离英格兰和克罗地亚等欧洲强国都尚有一段距离，整体实力雄厚嘅德国显然唔至于会毫无还手之力。但喺本场赛事嘅进程当中，德国众将继世界杯后再次为一众拥趸奉献出一场令人无法直视嘅表现。迪姆华拿和汤马士梅拿喺锋线上继续毫无作为，国家队初哥乌夫亦未能用好表现挽救球队；却奥斯喺中场线显得孤立无援，两位搭档基米治和安利简恩更多时间喺度做无用功；两个边闸祖拿斯希陀和真达则稳重有余，灵巧欠奉，导致德国边路进攻亦犹如一潭死水。老实讲，如果唔系荷兰整体把握能力欠佳，德国今仗注定会遭遇一场屠杀。
但其实细心一谂，德国如今虽则顶级新人欠奉，但人才根底犹在，单论整体实力仍属世界一流。而球队如今遭遇困境，主帅拿夫(Joachim Loew)嘅责任相信系首当其冲。喺俄罗斯世界杯惨淡收场后，本应该就此离任以谢天下嘅呢位教头最终继续稳坐钓鱼台，但已经稍显落后嘅战术思维同与处理个别球员之间关系呢两个突出问题亦一并留下。落选世界杯大名单嘅利莱辛尼虽然喺本期名单中回归，但拿夫显然仍未懂得如何使用此位风格突出嘅攻击手，而大将奥斯尔此前最终愤而退出国家队亦令外界矛头直指拿夫乃至整个迂腐嘅德国足协。曾经横扫千军嘅德国战车如今已经举步维艰，老臣子嘅动力不足与一众新紮师兄嘅不知所措喺场上相当刺眼，拿夫如果仲系未能够搵到问题嘅解决方法，咁是否意味住德国足球需要重新寻找一位新嘅解题人？
