每日都黐到实嘅NBA喺嚟紧礼拜六上午继续好戏连场，不过全日赛事嘅焦点却恐怕会摆喺一场胜负悬念不大嘅赛事中。基本锁定西岸第六嘅雷霆届时挥军凤凰城面对正「力保」西岸副班长位置嘅太阳，谁胜谁负相信大家都心中有数。不过本场嘅焦点毫无疑问将会係雷霆当家球星韦斯博克，皆因佢距离单赛季三双神蹟只有一步之遥，大家今仗有望见证历史。
目前NBA常规赛已经接近埋尾，而本文两位主角太阳和雷霆亦已目标明确，前者就係尽可能摆烂，力争在今夏选秀大会当中有更高机会被幸运之神眷顾；而后者喺基本锁定第六嘅情况下，目前亦已经进入季后赛备战状态当中。由于两者实力相差较大，而且太阳如今求败心态亦可谓路人皆知，今仗胜负悬念实在不大，雷霆今铺凤凰城之行注定满载而归。
但呢场较量真正值得关注嘅毫无疑问将係三双狂魔韦斯博克，皆因佢上仗与灰熊一战「仅」取得45分、10次助攻及9个篮板，未能延续三双强势。同时韦斯博克单季三双数亦暂时停留喺41次，距离打破「大O」罗拔逊保持咗55年嘅单季三双数纪录只有一步之遥，今仗面对弱不禁风嘅太阳，韦斯博克有望美梦成真。与此同时，韦斯博克距离打出赛季均场30+三双惊人表现亦仅差6次助攻，如无意外嘅话，呢位今季MVP大热将会喺凤凰城双喜临门，大家不妨一齐期待。
