三队嘅当家球星新赛季将频频展开直接对话。 本站上期浅析过一番关于NBA新赛季西南赛区嘅形势同前景，相信其实唔单止我哋，广大球迷应该都达成一个共识，呢个昔日嘅最强赛区竞争力今时唔同往日，佢哋嚟紧好可能净系要靠一支火箭扞卫德州人嘅尊严，而其他几强就要沦落到引人唏嘘嘅场面。既然系咁，今期笔者希望帮观众将惋惜落魄豪强嘅心情转台去睇一啲充满正能量又有无尽遐想嘅地方——大西洋赛区。
大西洋赛区有边5支球队相信唔洗专门介绍，宜家不妨先预览下头盘——纽约双雄。虽然身处美国最大嘅都会，而且都系历史悠久嘅老牌球队，不过纽约人同篮网近年确实屈屈不得志，近几年都同季后赛冇乜缘分。纽约人上赛季排东岸第十一，单凭一个波辛基斯确实冇办法兴波作浪，而且佢喺赛季后期又受重伤，令球队直接放弃季后赛门飞嘅争夺。今年暑假，纽约人喺引援方面又冇乜大动静，顶多新秀奇云诺斯值得期待。嚟紧新赛季，拉脱维亚人一日唔复出，纽约人都要接受任人鱼肉嘅命运；至于同城兄弟篮网，斋睇套阵容断估佢哋比起纽约人仲难翻身，人哋假假哋都可以盼住波辛基斯复出，而佢哋嘅领军人物竟然系出道以嚟一直被人唾弃嘅湖人弃将D.罗素，好彩佢都算生性打出中规中矩水准，之但系要以佢为领军人物带领篮网复兴听起身都觉得搞笑。好明显，纽约双雄新赛季都唔会系季后赛席位有力竞争者，但又唔至于衰到好似鹰队咁预定副班长位置，或者间中趁住状态好有机会爆下冷囖。
经历漫长又黯淡嘅重建长夜，七十六人卒之迎嚟曙光，而且目前睇起身太阳已经升到上午十点钟咁嘅程度。祖尔艾比迪从保持健康到宜家慢慢摆脱「时间禁令」，个人身手已经得到肯定，发展前景亦都成为所有人关注嘅焦点；宾史蒙斯闭关一年之后出山嘅「新秀赛季」诠释何谓状元首选，除咗唔识远射几乎冇短板；因为旧伤而缺席几乎成个赛季嘅马基利富斯慢慢喺实战入面兑现天赋，佢都深知自己将会系阵中第三号人物并且有信心演好呢个角色。七十六人上赛季终于打入季后赛兼且以东岸第三身份，好自然佢哋今季被视为东岸头把交椅一大有力竞争者，同样都系嗰句，以保持身体健康为前提。
唔同于七十六人崛起未久，最后要讲述嘅两支大西洋区球队已经拥有成熟嘅体系。速龙方面，今夏发生嘅地震级人事变动相信大家都知悉，虽然送走迪罗辛令人睇落管理层真系完全冇人情味，之不过连续惨痛于勒邦占士所领军嘅骑士脚下，就算「皇帝」选择西游，新嘅东岸竞争环境似乎变成空前激烈，既然系咁就痛定思痛换完主帅顺手换埋大佬。宜家潜在嘅暗涌在于，李奥拿德都有成季冇打正式比赛，唔知搵唔搵得翻过往喺马刺时期嘅水准，如果唔得，速龙注定又要承受一个失败嘅赛季，得嘅话分分钟入东决甚至总决赛，话晒都系带住冠军光环嘅男人吖！
笔者将塞尔特人放喺最后讲，相信大家唔会有太多异议，论阵容实力，健康嘅K.艾荣同G.夏禾特、成长速度好似搭火箭咁嘅积伦布朗同积逊达顿，另外仲有史马特、马古斯摩里士、路薛亚等稳阵到不得了嘅绿色扶持，绿衫军当然秤先过速龙；而论体系嘅成数度，史提芬斯注入嘅元素喺呢几年彻底激活呢支十八冠王者，绿色血液流淌得尤其沸腾，去到季后赛深入时刻，相信塞尔特人无论面对啱完成换帅嘅速龙定系后生仔居多嘅七十六人都可以笑到最后。
