公鹿将帅阿迪图昆保(中)同布丹贺沙(左)齐齐攞奖。
最佳第六人路易斯威廉士系历史后备得分王。
卢卡当锡新秀赛季令观众惊喜不断。 时间过得好快，仲有几日2019年正式进入下半Part，NBA总决赛硝烟早已消散，引爆球迷热议嘅话题马上转至以施安威廉臣为首嘅一班新扎师兄，而从早排开始至到未来一段时间就系各路豪强喺球员市场上嘅军备竞赛，每单交易同签约都掀动球迷嘅狂热，总之一年到头每日都有值得大家关注嘅元素。或者因为新闻精彩不断，以往大家都期待嘅年度单项大奖似乎冇咁多睇头，可能因为今季各个奖项归属都冇乜悬念吧。点都好，2018-19赛季嘅各个单项奖都已揭晓，呢啲各自范畴嘅佼佼者对于殊荣可谓当之无愧，下列笔者带大家回顾下几个「传统大奖」。
年度新人王
论人气、实力同颜值，过去呢季根本冇一个新秀可以同时结合几方面对独行侠新领袖卢卡当锡产生威胁，可能净系得特雷杨格喺某啲时候嘅神来之笔令同时间撞紧新秀墙嘅东欧新星终于感觉到有对手。而迪安祖艾顿、谢伦积逊、马云巴格利等等虽然都展现出超强天赋，但综合成季嘅表现嚟睇入唔到争奖行列系情理之中；好简单，卢卡当锡系史上第五个做到新秀赛季均场斩获「20+5+5」(得分、篮板同助攻)，另外4位分别系罗拔逊、米高佐敦、勒邦占士以及T.艾云斯，冇人试过爆冷失奖。回顾票选情况，卢卡当锡获得所有100张第一选票其中98张，另外2张属于特雷杨格，谂返起旧年宾史蒙斯、积逊达顿同当路云米曹「三足鼎立」，今年就算唔洗睇新闻，大家都知道卢卡当锡会以压倒性优势攞奖。
最佳进步奖
相对之下，最佳进步奖就多啲人一齐玩。D.罗素带领篮网以东岸第六嘅成绩杀入季后赛，个人数据迎来涨幅同时比赛掌控力令人刮目相看，最紧要系入选咗全明星，放喺以前已经够晒说服力；二年级控卫迪艾朗霍斯用行动证明自己已经系联盟最强「飞毛腿」，每次睇帝王嘅集锦几乎都见到佢高速突破变向、一条龙入樽、从后赶上送出排球式封波，呢类点睇都唔厌嘅暴力演出深得观众欢心，而最重要系投射命中率尤其是三分波有明显进步，帝王喺佢带领下曾经非常接近阔别十几年嘅季后赛。真系唔好彩，佢哋今年撞正井喷式爆发嘅施亚甘，呢位被誉为「喀麦隆杜兰特」嘅锋线跑腿数据全方位激增，系李奥拿德嘅最强副手，亦都系速龙队史首冠嘅重要功臣。因为有咁完美嘅一年，施亚甘获得86张第一选票，而D.罗素同迪艾朗霍斯加埋都系得13张，速龙前锋获奖无疑实至名归。
最佳第六人
另一个悬念唔大嘅奖项，成个赛季以嚟真系搵唔出一个对球队影响力可以好似路易斯威廉士咁样程度嘅后备，就算喺历史长河入面，我哋曾经觉得哥罗福特、真路比利已经非常犀利，不过真正嘅后备席王者始终系呢位未够33岁就成为历史后备球员得分王。连续2年、生涯第三次，照咁嘅势头发展，未来呢个奖改名叫「路易斯威廉士奖」真系一啲都唔出奇。
最佳主帅
若然呢个奖项系睇埋季后赛成绩嘅话，带领速龙创造历史嘅历克纽斯肯定系大热，可惜范畴局限于常规赛，呢位加拿大主帅无疑输蚀俾领导公鹿登上联盟之巅嘅布丹贺沙。过去呢个赛季，公鹿喺布丹贺沙麾下风头一时无两，以阿迪图昆保为战术核心，身边配搭著一班具备投射同快速反击能力嘅「长手怪」，另外29队基本上冇边个可以完全破坏佢哋行云流水嘅比赛节奏。而最令人惊喜嘅一招莫过于将传统中锋布鲁克卢比斯彻底改造成空间型内线，虽然联盟向来不乏高射炮，不过好似佢转变咁大而且效果良好嘅确系相当罕见。遗憾就系几位核心球员季后赛整体经验相对速龙嗰几只「老鬼」未够丰富，布丹贺沙如果想一尝总决赛滋味就要睇嚟紧下季点样维持球队竞争力同时学识更多拆解对手绝招嘅路数。
最佳防守球员
从票选情况嚟睇，获得六成五第一选票嘅R.高伯特都赢得几轻松，而喺佢成功坐庄之后，爵士亦成为历史上第二支拥有2名球员获得至少2次最佳防守球员嘅球队，第一支做到嘅系活塞(洛文2次&宾华莱士4次)。近呢几年，施尼达执教嘅爵士秉承传统铁血球风，而正因为有
