兩星期前，帥位不穩嘅莫連奴帶領曼聯面對紐卡素，嗰場波如果「寸王」未能全取3分，好有可能難逃被炒嘅惡運，最終紅魔喺落後兩球情況下，成功以3比2驚險反勝對手。莫帥死過翻生暫時保住帥位，不過佢可以苟且偷生到幾時真係未知之數，所以我覺得攞當年特務007經典戲名「Die Another Day」嚟形容佢嘅處境都幾貼切。
莫帥戰績長期不濟，都依然坐正紅魔帥位，其實真係要多得曼聯班主格拉沙家族。出晒名以生意為先嘅美國班主，只着眼曼聯嘅巨大商業價值，揾錢行先，隊波踢成點根本係次要，就算成績再差，都可以轉手將紅魔所有股權變賣賺番一筆，所以嗜錢如命嘅格拉沙家族，更加唔會輕易犧牲巨額毀約金，貿貿然辭退仲有兩年約嘅莫連奴。
格拉沙慳皮 刀下留人
查實早前面對紐卡素，曼聯眾將就用實際表現，證明只要畀心機，紅魔依然係一支充滿競爭力嘅球隊，不過紐卡素同車路士實力差距太大，今晚曼聯作客面對倫敦勁敵「藍戰士」，如果攞唔到滿意結果，紅魔聯賽排名隨時會跌落下游，到時面對來自董事會、甚至球會老臣子同球迷嘅壓力，格拉沙家族仲有冇能力保住「寸王」真係好難講。最後再提少少曼城主場鬥般尼，唔使問阿桂，都知藍月亮今場贏面有幾大，我認為英超1哥喺國際賽期之後，想輕鬆全取3分絕對冇難度。
