馬提尼克細守花旗
文:笛子波童
周四早上美洲金盃上演B組次輪賽事，由東道主美國主場出戰馬提尼克。「花旗國」於首輪意外失分，睇得出呢班二線兵經驗不足。馬提尼克首輪贏波信心爆棚，面對美國勢必擺鐵桶陣死守，中位數2.5球嘅入球細有買趁早。
（周四早上9時開賽、馬會網上文字直播）
美國戴亞單天難保至尊
呢場波睇落實力懸殊，但由於美國今屆刻意試陣，未有徵召丹普西等主力尖刀，首輪竟被巴拿馬逼和，搞到14屆參戰美洲金盃以外，首次未能「攞頭彩」。儘管新丁當姆戴亞連續2仗有士哥，但其他隊友腳頭無靈，單靠當姆戴亞數胡，實在有啲強人所難。連同上仗在內，美國近5仗美洲金盃分組賽錄得3勝2和，不過只係入得6粒咁大把，當中有4仗總入球開2球或以下，今屆仲係要用新人試陣，火力唔夠問題更為嚴重。
另邊廂，馬提尼克首輪輕取尼加拉瓜2比0，暫居榜首信心爆棚，依家佢哋手握3分，出線形勢大好，今仗打和都冇壞，面對有地利嘅美國必定大擺鐵桶陣死守，以「花旗國」咁弱嘅攻力，想攻陷佢哋城池亦非易事，轉捧入球細更划算。
