些路迪立油吼細盤
今晚蘇足盃決賽，些路迪將會同馬瑟韋爾喺中立場咸頓公園球場一決高下。已經攞齊聯賽同蘇聯盃冠軍嘅些路迪，今仗將會爭取取得三冠王頭銜，不過球隊臨近季尾都開始收韁，而且近年面對馬瑟韋爾入波都唔算多，呢場些路迪就算贏波，都應該難炒對手，入球細捧得過。
（周六晚上10時開賽）
羅渣士自上季接掌些路迪教鞭後，進一步鞏固呢支老牌球隊喺蘇格蘭球壇嘅統治地位，繼上季帶領些路迪完成三冠王霸業之後，今季佢哋又再次先後喺蘇聯盃同蘇超封王，佢咁叻仔，早前就自己攞埋蘇超年度最佳教練獎，當然希望連續兩季同球隊取得三冠王。不過隊波踢到季尾，集中力同狀態都好似跌跌哋，聯賽最尾兩輪都冇波入，仲喺煞科戰輸埋畀鴨巴甸，呢場實力佔優都未必可以大勝對手。
馬瑟韋爾主守少大敗
另一邊廂，馬瑟韋爾一離開自己地頭，班波就會踢得好保守，佢哋近6仗作客就全開2球或以下，加上今季聯賽佢哋已經試過以0比0逼和些路迪，呢場再次面對實力明顯超班嘅對手，馬瑟韋爾都應該會照辦煮碗，穩守為上，入球細應該都走唔甩。
