维拉富咸淡定有钱剩
升班终极斗细均力敌
英冠升班附加赛今晚上演终极一战，阿士东维拉同富咸将会喺温布莱球场交锋，争夺来季英超最后1个席位。呢场大战关乎1.7亿镑（约17.7亿港元）收入，双方定必谨慎应战，避免犯错令全季努力付诸流水。维拉喺附加赛以守为攻效果唔错，牌面较强嘅富咸季尾状态下滑，未必敢轻率主攻，预料两队惊输唔会乱嚟，博入球细好路。
（周日凌晨零时开赛）
英超球队收入向来丰厚，今仗边队可以升班，未来3年至少有1.7镑收入，为名为利压力都劲大，今仗好难唔踢得绑手绑脚。睇番过去5年英冠升班附加赛决赛，5场波都系劲少入球，全部总入球都唔超过2球，包括上年哈特斯菲尔德同雷丁踢足120分钟都交白卷。
维拉近7仗5场保清白
维拉今季拎到英冠第4位，附加赛两回合计以1比0淘汰米杜士堡，喺争升班嘅关键时刻，以泰利、侯顿等老将为首嘅防线起到好大作用，领队布鲁士防守战术滴水不漏。阿士东维拉喺近7仗赛事有5仗保持不失球，其中6仗总入球为2球或以下，稳中求胜政策有良好效果，今仗决战肯定会沿用呢个战术。
拥有阿历山大米祖域、赖恩施斯隆等新星嘅富咸，在联赛一度连续23仗不败，可惜喺煞科战输波即错失直接升班资格，附加赛首仗亦以0比1输畀打比郡，好在次回合反胜2比0晋级。2场败仗可见，富咸喺压力下往往表现失准，射手阿历山大米祖域亦陷入球荒，富咸要攻破维拉大门有难度，决赛场合难免踢得谨慎，开入球细机会极高。
