C朗衝冠皇马经验赢红军
基辅爆发巅峰决战
欧联王者最终争夺战，周日凌晨将会喺乌克兰基辅爆发，连续2届称霸欧联嘅皇家马德里，硬撼阔别决赛多年嘅利物浦。利物浦虽然有穆罕默德沙拿担旗，不过有基斯坦奴朗拿度（C朗）压阵嘅皇马，近年入得决赛都可以喺法定时间解决对手，经验赢晒伤兵情况严重嘅「红军」，有力缔造3连冠霸业，皇马上盘唔好错过。
（有线 622、604、602及603台周日凌晨2时45分直播）
11年来首度杀入欧联决赛嘅利物浦，绝对称得上系今届嘅一支奇兵，尤其火力全开嘅强攻型打法，简直系睇波球迷嘅福音。红军今届自附加赛起计12仗狂轰46球，打破历届欧联球队单季最多入球数纪录，不过辉煌嘅入球数纪录，背后掩盖左嘅系球队防线不稳嘅事实，红军今季欧联至今失过16球，其中4强次回合就试过作客以2比4输畀罗马，后防漏洞表露无遗。而且搏杀左成季嘅利物浦嚟到季尾，可以话系伤兵满营，后卫祖尔麦迪比、祖高美斯同中场阿历士张伯伦提早收咧，德国悍将安利简恩又受背伤困扰，中场得番占士米拿、佐敦轩达臣、韦拿杜姆同拉尔拉拿可用，4人都系明显攻强守弱嘅中场，点可以帮到原本已经不稳嘅防线呢？
施丹弃本土赛孤注一掷
已经连续2届捧起欧联奖盃嘅皇马，教练施丹今届放弃本土战线，孤注一掷全力争取欧联3连霸，佢的嘅王牌射手Ｃ朗今届已经累积15个士哥，位列欧联射手榜榜首，仲领先对面「红军」埃及入球机器沙拿5球，睇得出呢位葡萄牙球星想攞冠军嘅决心。而且「银河舰队」近6次闯入决赛全部捧盃之馀，其中4次喺法定时间已经击败对手，堪称欧联专家，面对等左咁多年嚟先有机会行近欧洲之巅嘅「红军」，皇马经验肯定更值信赖，呢场捧皇马上盘。
