世盃揭幕战大有睇头！
俄罗斯做东火併沙特
4年一度嘅世盃今晚拉开战幔，由东道主俄罗斯喺A组迎战亚洲球队沙特阿拉伯。虽然戏码唔算好劲，但话晒揭幕战，又点可以错过！「战斗民族」俄罗斯身为主办国，喺乡亲面前唔衰得，誓要击败同组实力最弱嘅沙特，为出线打好基础；沙特近期热身赛对欧洲球队唔算失礼，两军抢攻博出线，可望合演入球骚，中位数2.5球嘅大盘有2.15倍值博！
（Now 616、618及ViuTV 99周四晚11时直播）
「新沙皇」迪沙高耶夫担大旗
有球迷笑话今场系史上最弱鸡嘅揭幕战，皆因俄罗斯现时世界排名第70，而沙特阿拉伯高啲排第67，除左畀同组嘅埃及同乌拉圭低之外，更系今届32强中世界排名最低嗰两队。俄罗斯近况唔算好，之前7仗热身赛仅得3和4负未赢过，而且场场都有失波，防线坚唔稳阵。但正所谓「黑到尽头就会谷底反弹」，俄罗斯叫得做「战斗民族」，揭幕战喺自己地头面对同组牌面最弱嘅沙特，点都想赢波一吐乌气，如果能尽擸3分，对出线极有帮助。俄军以「新沙皇」迪沙高耶夫铺桥搭路，配合近两季先后夺得俄超金、银靴嘅射手史莫洛夫，今场要入波唔系难事。
沙特「有骨鱼腩」识入波
亚洲雄师沙特阿拉伯自2006年后再次打入世盃决赛周，呢支昔日鱼腩部队，集训左几个月，系32强中时间最长一队，可见态度几咁认真。沙特近5仗热身赛获2胜3负，唔算太曳，若单计同欧洲球队「拍跳」，近4仗虽只得1胜3负，但其中3仗有波入，包括同以1比2仅负畀劲旅意大利及德国，上仗更是球队历史性首度攻破「日耳曼兵团」大门，一班箭头信心大增，而且喺呢4仗热身赛中，有3仗开3球或以上，有力争取喺今晚揭幕战入波，中位数2.5球嘅大盘乃不二之选。
