内乱狂牛唔敢急攻 西葡双牙战吼半和
今晚世盃B组首轮爆发「双牙大战」，由葡萄牙硬撼西班牙。葡萄牙不嬲保守到晕，西班牙开波前先搞单阵前易帅大大镬，军心大乱，仲要搵冇乜执教经验嘅名宿希亚路临时顶档，依家最重要系万事求稳，随时闷战一场，加上两军近期碰头例开半场和，为免影响出线必稳打稳扎，半场和值得追多铺。（Now 616、618及ViuTV 99周六凌晨2时直播）
呢场伊比利亚半岛打吡，绝对系今届世盃分组赛焦点战。虽然葡萄牙有「士哥」不断嘅队长C朗担大旗，但2年前爆冷喺欧国盃封王，其实多得主帅费兰度山度士嘅稳守突击战术。
葡萄牙複製欧国盃绝招
除左C朗之外，其他球员都需要帮手防守，配合由门将鲁尔柏迪斯奥、中坚比比及般奴艾维斯为首所组成嘅铜牆铁壁，真系密到插针都插唔入，既然呢招使得，面对强敌一定会先玩龟缩。
但势估唔到西班牙玩自爆，原本同「狂牛」续约2年嘅主帅洛佩特吉，日前又宣布世盃后转教皇马，激到西班牙高层扎扎跳，前日更不顾一切炒佢鱿鱼，急急搵嚟球队总监希亚路接手。有指喺洛帅被炒之前，以队长沙治奥拉莫斯为首嘅重心球员齐声力保呢位教头，可惜「狂牛」高层一意孤行，依家军心大乱，虽然希亚路系西班牙名宿，但未必镇得住一班大帝，而且佢退役后教过西乙奥维多1季咁大把，大部分时间都系做管理层，执教经验坚少，教西乙都唔多掂，点带兵打水准更高嘅世盃呀？
翻查纪录，原来「狂牛」连世盃及欧国盃在内，近4届大赛首轮仅得1胜1和2负，包括上届世盃首轮以1比5惨败畀荷兰，为之后惨成世盃史上最早出局嘅卫冕球队埋下伏线，依家内部立立乱，为免重蹈覆辙，一定会小心为上。西班牙于近4次大赛首轮全开半场和，而且近4次「双牙大战」，亦有3次开半场和，咁好路梗系追。
