埃及硬骨头骾亲俄罗斯
沙拿复出绝地反击
世盃分组赛第二轮，周三凌晨打到嚟，东道主俄罗斯将会坐镇圣彼得堡迎战埃及。俄罗斯喺世盃揭幕战狂入靓波，大炒沙特阿拉伯5粒，不过呢场硬撼要搏命抢分，兼有穆罕默德沙拿复出嘅埃及，俄罗斯想过骨边有咁易？宁愿捧番埃及下盘好过。
（Now 616及618周三凌晨2时直播）
东道主首捷因对手业馀
东道主俄罗斯喺揭幕战入嘅5球波，可以话一球精彩过一球，唔止俄国大佬普京喺看台包厢入面睇到笑晒口之外，就连中立球迷都大包眼福，可以话系为呢届世盃盛事开左个好头。俄军一班进攻球员好波固然抵讚，尤其后备上阵嘅卓利舒夫，大骚多年游历西甲赛场所练就嘅乖巧脚法，个人梅开二度，真系令球迷拍案叫绝，不过另一方面都真系要弹对手沙特阿拉伯，佢的嘅业馀级防守演出，绝对唔系一支世盃决赛周球队应有嘅表现，俄军球员见对手频频送大礼，梗系把握机会入多几粒。老实讲，东道主上仗喺攻守两端，都冇受到太大挑战，5比0嘅战果唔可以完全反映俄罗斯嘅真正实力，相反今仗面对埃及，先至系一班俄仔见真章嘅大战。
「法老兵团」防线唔曳
有多位主力喺欧洲主流联赛揾食嘅埃及，实力绝对有保证。上仗「法老兵团」虽然以0比1输畀乌拉圭，但系成场比赛埃及一班后防球员表现其实唔曳，成功箝制对方两位世界级前锋苏亚雷斯同卡云尼，冇畀到佢的太多发挥空间，防线稳健有目共睹。最重要嘅系，埃及法老王穆罕默德沙拿首战轮休之后，呢场好大机会正选上阵，挑起进攻大梁，有佢在阵埃及进攻效率即刻升几班，加上首战输波嘅埃及，为力保出线机会，呢场点都会焗攻。俄罗斯如果未能收拾上仗大胜嘅心情，以自满嘅心态应付埃及，随时会受到惩罚。睇好埃及摆脱首战输波嘅阴影，下盘唔好错过。
