总决赛G1将会喺周五早上开波。
速龙王牌李奥拿德今年季后赛尽情发挥昔日FMVP本色。
勇士球星史提芬居里上轮系列赛尽显领袖本。 万众瞩目嘅NBA总决赛将会喺北京时间礼拜五上昼拉开帷幕，系列赛头2场速龙都会坐镇主场迎战勇士。两队各自嘅分岸决赛过关难度明显唔同，勇士直落四盘搞掂拓荒者，以逸待劳嘅备战方式令自己有足够时间部署王朝之路嘅最后几步；而速龙就喺陷入被动嘅情况下连赢四场打到常规赛冠军公鹿措手不及，最终达成队史首入总决赛嘅成就，全队上下士气倍增。然而嚟紧嘅G1，胜利天秤预计稍微倾向勇士，皆因经验丰富嘅佢哋已经保持多场系列赛首战不败，而主队身为总决赛初哥首先要做嘅就系搵到属于自己兼且又可以限制对方嘅节奏。
东西岸决赛回顾
东岸决赛头2场作客均场净负公鹿15分，原本以为速龙陷入万劫不复系列赛大局已定，但G3开始后者返到主场竟然元神归位，连下两城将悬念留待「天王山」揭晓；关键战，尽管公鹿嘅阿迪图昆保、保格当、布鲁克卢比斯等人依旧勇猛，但誓估唔到对方三分波全面复苏。其中最抵赞绝对系被外界诟病多时嘅云维利特，该役9射7中延续G4好手感之余仲将呢股热量带埋去G6，东决后3场三分波总共出手17次命中14个，有传话系因为仔仔啱出世脚头好喔，点都好，云维利特呢几场嘅表现已经喺速龙队史留低一笔。论晋级最关键人物非于李奥拿德莫属，进攻端均场30分(6场总共179分)嘅含金量不言而喻，防守端当佢主防阿迪图昆保嘅时候，公鹿进攻效率大幅下滑，咁高水准嘅表现绝对系勇士嘅心腹大患。睇完东决6场大战之后，相信各位观众都畀速龙嗰股韧劲所震撼，总决赛即将开打，唔知速龙又会为大家带嚟啲乜惊喜咧？
唔同速龙再次打出一轮荡气回肠嘅系列赛，勇士喺西决可以话冇遇过任何阻滞。众所周知杜兰特系勇士过去两年夺魁嘅最大功臣(两获FMVP)，而佢喺今年第二圈打火箭嘅时候意外受伤，其后一直休战，据悉呢位今年季后赛均场可以斩获34.2分嘅超级巨星总决赛G1依然缺阵。或者系天意，喺杜兰特受伤嘅近5场比赛，近两季被唔同派系嘅众多波友视为「公敌」嘅勇士引领观众「梦回2015」，喺史提芬居里同特雷蒙格连一攻一防两大核心带领下，球队重现最赏心悦目嘅团队型高速攻防转换，无论顺境定系逆境都可谓威力无穷。睇下拓荒者点输就知，有2场曾经领先10几分，但勇士稍微一发力(特别系第三节)就瞬间抹平差距，落后嘅话就仲加冇得倾喇！所以对于速龙嚟讲，勇士总决赛经验比自己丰富得多，点样打乱佢哋嘅节奏系赢波之前必须解答嘅难题。
阵容预览&打法预测
就最新情况嚟睇，两队阵容齐整程度大致同之前分岸决赛相似，伤兵名单冇添加任何名字，速龙净系得前锋阿奴诺比继续养伤避战，而勇士就迎嚟利好，中锋D.卡辛斯已经参加对抗性训练，复出之日越嚟越近。
如无意外，历克纽斯会沿用打公鹿嘅致胜正选五虎，罗利同丹尼格连镇守后场，李奥拿德同施亚甘喺侧翼发起冲击，M.加素尔继续发挥其顶级高位策应能力，帮助队友发扬射杀公鹿嗰阵时嘅三分水准。勇士方面后场一定系「浪花兄弟」，特雷蒙格连依然系攻防转换发动机，但另外两个名额就存在变数。对阵拓荒者嘅G4喺伊古奥达拿因伤避战嘅情况下麦基尼同佐敦贝尔就出任正选，咁样嘅话转换速率会更快，但防守同篮板可能唔够保证，李奥拿德见到咁嘅对位强度实系流晒口水；若然用保格特保护禁区都系唔错嘅选择，但速度就降慢，打阵地战甚至会陷入被动，宜家关键都系睇下伊古奥达拿到时打唔打得，睇嚟史提夫卡尔都几头痕。
值得一提嘅系，虽然速龙今季常规赛双杀勇士，兼且拥有今轮系列赛嘅主场优势，但要注意勇士已经连赢十二场系列赛首战，而且佢哋喺连续22轮系列赛当中至少有1场作客赢波，有见及此，后者似乎更倾向于收获本轮系列赛开门红。
