歐冠盃:巴塞冇美斯啃唔落國米

周四凌晨歐聯分組賽，有B組巴塞隆拿主場對國際米蘭。今季表現飄忽嘅巴塞，核心美斯近期重傷要長抖，實力大打折扣，面對啱啱喺米蘭打吡贏波，士氣大振嘅國米，細鬼覺得巴塞好難有本錢讓波，捧番國際米蘭下盤好過。

（有線602及662台周四凌晨3時直播）

國米暫時於分組賽兩戰全勝，同B組1哥巴塞同積6分，國米今季歐聯開局表現強勁，早前兩戰都在落後下反勝，睇得出班波嘅質素。早前我旁述米蘭打吡，結果國米憑出色發揮成功取勝，令我印象深刻，佢哋除咗有迪維積同史堅尼亞鎮守後防，前場近3仗都有波入嘅射手莫路伊卡迪腳風都勁順，戰鬥力有保證。

相反巴塞嘅情況不容樂觀，皆因球隊核心美斯早前喺聯賽上陣時，搞到手臂骨折，呢場肯定唔使預佢，不嬲患有「美斯依賴症」嘅巴塞冇咗呢位阿根廷巨星，級數即刻低幾班，加上球隊今季表現本身就唔穩定，呢場隨時有失分危機，細鬼相信國米只要踢返早前米蘭打吡一役嘅水準，作客巴塞想帶走1分絕對冇難度。