多蒙特今季各項賽事表現出色，皆因前場人才濟濟，有英格蘭新貴查頓辛祖提供強力側擊之外，馬高列奧斯等攻擊手都有超強實力，球隊火力認真驚人。上周末多蒙特對史特加嘅賽事，筆者有份參與評述，其中近期搶盡風頭嘅前鋒柏高艾卡沙再次有波入，幫助多蒙特開波冇耐就搶得3比0領先優勢，主帥法夫爾睇見形勢大好，早早就將呢位西班牙射手換出，而換入嘅麥斯菲臘表現都唔失禮，幫助球隊錦上添花鎖定4比0勝局。
法夫爾咁早（扌禁）制換出柏高艾卡沙，無非都係想留力周中歐聯，希望喺主場面對同樣分組賽2戰全勝嘅馬德里體育會關鍵一役，可以攞到好成績。眾所周知，歐聯分組賽第3同第4戰嘅戲碼都係一樣，分別只係對戰雙方主客關係互換，而A組多蒙特同馬德里體育會齊齊攞住6分，兩隊晉級機會可以話已經高唱入雲，餘下目標肯定係以爭小組首名為主。我相信「蜜蜂兵團」靠住一班表現出色嘅進攻好手喺前場揾食，呢仗面對馬體會絕對可以坐和望贏。
紅軍超班炒得起紅星
另外C組方面，首輪擊敗巴黎聖日耳門嘅利物浦，雖然喺第2輪不敵拿玻里，不過我認為紅軍出線機會依然高企。皆因佢哋嚟緊歐聯兩戰對手塞爾維亞球隊貝爾格萊德紅星，雖然早年曾經威震四方，不過今非昔比，實力明顯欠奉，利物浦想連續兩戰全勝搶晒分，兼喺C組脫穎而出根本冇難度，呢場先喺主場出擊，超晒班嘅紅軍贏1球都嫌少。
