13戰12勝 坐底贏兩粒
今晚繼續上演歐聯第3輪分組賽，C組重頭戲巴黎聖日耳門（PSG）主場迎戰意甲拿玻里。PSG目前落後拿玻里及利物浦排小組第3，想連續7屆躋身歐聯16強，呢場6分波唔可以甩拖。PSG今季13場比賽唔單止贏咗12場，而且全部淨勝2球或以上，PSG讓一球照捧上盤。
（Now 645、有線601及661台周四凌晨3時直播）
尼馬蓄銳歐聯搏殺
PSG上周末主場5比0大勝艾米恩斯，法甲開季10戰全勝，喺國內基本上已搵唔到對手，現階段自然要集中火力喺歐聯賽事。PSG首場分組賽2比3作客輸畀利物浦，依家只排C組第3位，想攞番出線主動權，今場及下輪兩鬥拿玻里最關鍵。睇番PSG對上6屆出戰歐聯分組賽都可以進身最後16強，而且每屆分組賽從未試過輸多過1場，如果再輸都咪話唔危，所以今場更要把握主場優勢搶3分。由季初法冠盃起計，PSG今季各項賽事出戰13場，唯一敗仗就係頭先所講輸畀利物浦，其餘12場全部贏晒，而且加埋入咗47球，全部都能淨勝2球或以上，完全唔會收韁。王牌尼馬上場聯賽休息，今場養精蓄銳夥拍基利安麥巴比及卡雲尼攻堅，絕對唔愁冇波入。
拿玻里作客差好遠
拿玻里上場分組賽1比0擊敗利物浦，現時以4分高踞榜首，不過拿玻里上屆歐聯分組賽3場作客全部輸晒，就算今屆換上新教頭安察洛堤領軍，首場分組賽面對同組最弱嘅貝爾格萊德紅星亦只能悶和0比0，發揮明顯唔及主場穩定，更何況，佢哋今季喺意甲作客亦曾經輸過畀祖雲達斯及森多利亞，5場作客聯賽只有1場冇失波，遇上實力較強嘅球隊明顯處下風，今場一於捧PSG上盤。
