日聯盃:鹿角夠銳再插水手

近6次主場對賽全勝
今晚日聯盃爆發2場4強首回合，其中有重頭戲鹿島鹿角主場迎戰橫濱水手。鹿角雖然多線作戰，但愈戰愈勇冇走樣，氣勢如虹，而且近6次喺自己地頭出擊對水手贏晒，擺明格食格喇，小讓平半，一於捧上盤。
（有線662及602台周三晚6時直播）

鹿角依然要兼顧日職、亞冠盃、日皇盃及日聯盃4條戰線，其中後3條戰線仍有叫胡機會，令人擔心呢支日職勁旅會攰到爆。不過，睇番佢哋喺各項賽事近8場波，於法定時間取得6勝2和，特別係鈴木優磨、沙真奴及里奧施華等中前場主力腳風奇順，近5場聯手貢獻6粒，就算中場三竿健斗因要踢「太公波」而缺陣，火力依然保證。

橫濱水手作客遇強即屈
水手雖然喺各項賽事近7場取得6勝1負，可惜呢班波作客遇強即屈，今季造訪聯賽前列分子如川崎前鋒、廣島三箭、FC東京、北海道札幌岡薩多及今場對手鹿角，全部輸晒，可見佢哋客場遇強例必騰晒雞。翻查紀錄，鹿角近6次主場對水手贏晒，加上水手前鋒伊藤翔因傷倦勤，今場難逃厄運。

湘南比馬唔赦柏雷素爾
至於同晚另一場日聯盃4強首回合，柏雷素爾主場火併湘南比馬。柏軍近況不濟，聯賽連盃賽近8場只得2勝3和3負，7場有失波，共失14球，曳到冇朋友。相反，比馬近8場只係輸得1場咁大把，輸嗰場係對弗到爆嘅鹿角，敗不足據，何況柏軍射手伊東純也入選日本國家隊，今場缺陣，火力進一步受削，今仗惡唔出樣，比馬受讓必捧讓球客勝。