洛里斯发波瘟热刺大镬
今晚英超有场强弱悬殊之战，热刺续于温布莱球场迎战卡迪夫城。新败嘅热刺谷埋成肚火，遇上完全唔够班嘅卡城，赢波应该冇难度，不过门神洛里斯复出以嚟频频虾碌，今场未必保得住清白之身，转捧中位数2.5球入球大好过。
（Now 621周六晚10时直播）
热刺喺刚周中欧联激战到尾，最终以2比4输畀巴塞隆拿，虽然系技不如人，但去到末段揿住对手嚟砌几乎追得番，点知转过头输多粒，其实有啲唔抵。好彩射手哈利卡尼弗爆，近4场入4粒，难得撞正弱旅卡城，实当佢系出气袋喇！卡城又确系争唔落，今季升班后，联赛连盃赛未赢过之馀，最近5场更加输晒，球员信心尽失，明显未够班踢高水平赛事。
卡迪夫城入得失得
老老实实，热刺今场应该赢梗，不过佢的嘅队长兼门神洛里斯，之前受到酒后驾驶丑闻及伤患困扰，上场对巴塞复出又发波瘟，自己犯错搞到开波冇耐已经失波，踢到中段亦试过出迎失误，赛后洛里斯都话自己需要更加专注比赛，睇嚟呢位法国勇夺世盃功臣唔多弗，随时成为热刺防线计时炸弹。睇番卡城虽然5连败，但有4场都有士哥，而且今场主胜赔率奀到晕，不如转捧2.5球嘅大盘。
