艾拉维斯当起唔赦皇马
周日凌晨西甲大战，艾拉维斯主场挑战皇家马德里。皇马近期表现跌晒Watt，尤其一班前锋齐齐哑火，把握力欠奉，呢场要作客对住演出够硬淨嘅艾拉维斯，皇马想轻鬆过到骨边有咁易？捧返艾拉维斯下盘好过。
（Now 632周日凌晨零时30分直播）
巴利艾斯高上阵成疑
今夏经历大换血嘅「银河舰队」，近排战绩曳爆，继早前联赛0比3遭西维尔大挫之后，上仗作客远赴俄罗斯踢欧联，仲意外输波收场，各项赛事近3仗未赢过之馀，连波都入唔到，前线攻力认真麻麻。其实新帅洛佩特吉季前已经有先见之明，认识皇马喺C朗离队之后，锋线实力欠缺嘅问题，所以先买番马里安奴戴亚斯，不过呢位多米尼加前锋嘅级数始终冇得同C朗比较，加上进攻好手加里夫巴利同艾斯高都有伤上阵成疑，如果仲想斋靠明显冇料到嘅宾斯马，皇马呢场可唔可以打破入球荒真系未知之数。
相反上季护级分子艾拉维斯，今季开局痛定思痛生性番，大踢争气波，尤其主场发挥有保证，近3仗未输过，乘势抢上联赛积分榜前半版位置。队中几位攻击手演出值得留意，除左有伊拜高美斯频频入靓波之外，新加盟嘅快翼祖尼都交到货，至今已经贡献4次助攻，成为球队抢分嘅主力。踢开稳守突击嘅艾拉维斯，呢场面对一味讲求控球皇马，绝对唔输蚀，所以艾拉维斯下盘绝对系好路。
