拜仁迎击慕逊大有睇头
今晚压轴戏拜仁慕尼黑主场斗慕逊加柏，拜仁已经连续3场正式赛事赢唔到波，新帅尼高高华备受庞大压力，今晚主场出击誓踢翻身仗，遇上近况当锐而且前线着火嘅慕逊加柏肯定好睇过戏，预期双方会合演入球骚，推介1.7倍嘅中位数3.5球大盘。
（on.cc东网周日凌晨零时30分直播）
拜仁新帅尼高高华近期诸事不顺，喺德甲先畀奥格斯堡临完场前逼和，跟住作客输埋畀哈化柏林，然后欧联主场打阿积士亦只能失望咁踢成1比1，连仗失利后仲爆出更衣室有唔和谐声音，中场占士洛迪古斯埋怨有球员无论踢得几差都有得担正，好明显针对国宝级「金童」汤马士梅拿，仲话如果情况冇改善，唔排除会离队添！
慕逊加柏新箭头有料到
尼高高华近期亦以行动回应，搵左汤马士梅拿详谈照肺，今仗占士洛迪古斯同历卡斯苏尼呢啲有怨言嘅球员都会担正，今晚主场出击值得畀多次机会。不过拜仁近期战绩下滑，主要原因系中场防守能力薄弱，查维马天尼斯明显缺态，堤亚高艾简达拿又唔够硬淨，根本唔系防中材料，搞到好易畀人打反击，面对以反击闻名嘅慕逊加柏，想保持清白之身绝唔容易。
慕逊加柏今季既进步又稳定，目前已经杀上联赛榜前4名，最难得嘅系前线愈战愈勇，身价达到2,300万欧元嘅贵价新前锋柏利亚好快已经证明物有所值，除左6场联赛入4球之外，佢嘅走动同互传亦激活左全队锋线，难怪被评为德甲开季至今表现最抢镜前锋，慕逊加柏今季德甲场场有波入，近4轮共轰入9球，面对欠缺中场屏障嘅拜仁防线有力偷鸡，大盘最稳。
