曼联立立乱华伦有鸡偷
欧联分组赛H组曼联主场迎战华伦西亚。红魔近期走势明显下滑，加上场外负面新闻不断，搞到领队莫连奴帅位危危乎，加上球队以往主场对亲西甲球队优势都唔明显，呢场随时畀华伦偷到鸡，让球客胜博得过。
（Now 643、有线602及662台周三凌晨3时直播）
执掌曼联教鞭第3季嘅领队莫连奴，今季联赛开局曳爆程度，足以同当年莫耶斯接替费格逊后首赛季嘅惨淡睇齐，尤其曾经令对手闻风丧胆奥脱福球场，今季冇晒主场威力，继输畀热刺同遭联赛新军狼队逼和之后，早前英联盃90分钟法定时间内主场仲同打吡郡打到难分难解，最终12码更不敌呢支英冠对手遭淘汰，近3仗主场未赢过。踢到咁球迷肯定唔收货，除左寸王首当其衝受批评之外，阵中唔少主力其实都要孭镬，尤其中场核心保罗普巴身为队中天价球员之一，表现同薪酬完全唔成正比，演出时好时坏，呢位法国球星如果唔改变过分个人化嘅踢法，面对欧联强敌随时累全家。
红魔欧战主场忌西甲兵
华伦西亚今季开局虽然较慢热，不过上仗作客击败皇家苏斯达，状态回勇，尤其今季成功留住洛迪高摩连奴同干度比亚等猛将，又成功买断攻击好手干卡路古亚迪斯嘅合约，呢位葡萄牙新星擅长边路发难，有力靠侧击威胁曼联防线。况且曼联过往欧战对亲西甲球队都唔算出色，主场出击往往都冇乜优势，近7次欧战主场面对西甲对手只取1胜3和3负。蝙蝠军团只要好好向近期作客成功挑战红魔嘅球队取经，想揾出曼联嘅弱点唔系难事，睇好佢的成功抢分，让球客胜捧得过。
