爭標關鍵戰球王激鍊
車路士同利物浦將於4日內第二度交鋒，周中英格蘭聯賽盃兩隊都冇派最強陣容應戰，結果車仔憑夏薩特入世界波贏2比1，今晚英超再碰頭兩軍定必精銳盡出。由於車仔上仗扳平一球有爭議，紅軍領隊高普條氣仲好唔GUR，復仇味濃，隨時作客照搶攻，樂比捧中位數2.5球大盤。
（Now 621周日凌晨零時30分直播）
過往兩隊碰頭戰情多數膠着，事關車路士前領隊干地踢法較為保守，領軍兩年對利物浦4次都係得1次開到大，不過崇尚進攻嘅現任領隊沙利就唔同，「沙利球」意念在於傳控走位同第一時間嘅高位搶逼反擊，呢種踢法可謂好睇唔好食，對住弱隊固然可以為所欲為，但遇到實力較強嘅對手就容易失波，好似上月對阿仙奴半場已失兩球，幸好前線夠質素最終贏3比2，今場對如日方中嘅利物浦，想唔失波可謂相當困難。
當然，沙利踢法咁進取全因車仔前線太多武器，新加盟嘅大腦佐真奴費路已融入球隊，配合另一新兵高華錫輔助，前面可以輕易配搭到兩套唔同陣容，尤其係「夏世三」夏薩特持續大勇，喺新戰術體系下如魚得水，淨係計聯賽已射入5球，論表現一啲都唔輸蝕得過紅軍球王穆罕默德沙拿。
「夏世三」唔比沙拿輸蝕
喺莊家心目中，今時今日嘅利物浦已接近去到「巴塞」級，主場對弱隊讓兩三球係基本，連作客對今季不敗嘅車路士，「讓球主客和」都要讓波，不過呢個盤樂比絕對唔敢用誇張嚟形容，因為紅軍今季進一步補強後，確實有能力擊敗世上任何一支球隊，雖然佢哋今季全勝紀錄剛被車仔終止，但嗰場聯賽盃紅軍一共換咗8名正選球員，出局反令佢哋更專注於聯賽同歐聯，可謂百利而無一害。
老實講今場戰果難料，就好似幾日前聯賽盃咁，球證一個睇漏眼誤判，又或者好似夏神、沙拿呢類球王靈光一閃，射球世界波戰果就可以完全改變，所以樂比認為玩大盤最實際，今晚一於坐定定欣賞兩位球王對決仲好啦！
