瑞典弱细难捉俄
前线凋零冇埋核心
欧国联各级分组赛进入尾声，其中周三凌晨B2组煞科战瑞典主场迎战俄罗斯。屈居小组第2嘅瑞典，同1哥俄罗斯只差3分，仲有机会争出线，可惜球队前场攻力实在疲弱，面对今届防守表现稳健嘅俄罗斯，瑞典就算主场出击都难抢分，宁愿捧2.5球细盘好过。
（有线618台周三凌晨3时45分直播）
岩岩喺世盃闯入8强嘅瑞典，取得唔错成绩，可惜呢支北欧球队不嬲踢法唔算进取，大赛后正经历改朝换代，其中老将托禾伦国家队退役之后，令到瑞典前场进攻人手更见短缺，尤其负责接棒嘅约翰古达迪，今季发挥唔算出色，仲因为咁喺所属西甲球会艾拉维斯沦为后备，加上中场核心科斯贝治今次因伤落选大军，冇左呢位效力德甲RB莱比锡嘅中场大脑压阵，瑞典进攻肯定会遇到阻滞。
俄罗斯够稳以守代攻
况且俄罗斯今届欧国联后防踢得够稳，3场战罢只失过1球，而且近6次同瑞典交手全开2球或以下，呢场佔尽积分优势嘅俄罗斯，喺只要打和就可以出到线嘅情况下，肯定会以守代攻，力保小组榜首位置，睇怕瑞典出尽浑身解数都好难攻破俄罗斯防线，细盘好路。
