切尔达剃苏过关佳选
虽然今晚赛事唔多，但阿King一样有笋野推介，最有心水系西甲独脚戏，皇家苏斯达于主场迎战切尔达。皇苏依家唔单止伤兵满营，连中场指挥官伊拿拉文迪今仗都要坐波监，何况今季「主场不利」，切尔达有新帅效应，有得受让必捧让球客胜。
（Now 632周二凌晨4时直播）
两队都位列中游，皇苏今季应该唔记得拜神，开咧后伤兵名单总系水蛇春咁长，虽然有守将阿列斯艾路斯当度同萨尔杜亚复操，但苏比迪亚、洛迪古斯拿华斯、卢卡辛加利、梅基兰斯同奥耶沙巴尔仲养紧伤，最弊系中场指挥官伊拿拉文迪黄牌够数，今仗要自动停赛，冇左呢位出道时被称为「新沙比阿朗素」喺中场组织攻守，皇苏随时乱晒龙。
新帅领军唔赦苏斯达
切尔达近况都唔掂，近8场赢得1场咁大把，高层亦忍无可忍，早前怒炒主帅安东尼奥穆罕默德，搵嚟新帅米基尔卡度素接手，查实呢位教头10月先畀南特炒鱿，咁快就搵到新工，有几多料就唔知。不过新帅上任总有一段「蜜月期」，而后卫尼斯达阿拿祖伤愈可候命，有助巩固防守。加上皇苏今季「主场不利」，开咧后5场主场赛事，只得3和2负未开斋，实在让唔起有新帅效应嘅切尔达，让球客胜有计。
串拖连奴平手盘汉堡胜
至于意甲卡利亚里主场对拖连奴，拖连奴主帅马沙利日前唔舒服要入医院，幸事后证实冇乜大碍，今仗亦可喺后备席领军，而拖军近3次作客卡利亚里赢晒，平手盘有计。（Now 638、有线654及614台周二凌晨3时30分直播）最后系同时间开波嘅德乙，汉堡主场对柏林联。汉堡今季降班后如虎入羊群，近5场联赛取得4胜1和弗到震，南韩新星黄喜灿好番抖够归队，主胜有计。
