红魔有火够炒年青人
H组另一场赛事，曼联坐镇奥脱福球场迎战年青人。喺小组以7分排名第2嘅红魔，上仗欧联击败强敌祖云达斯士气大振，有力乘胜追击，相反小组赛未赢过波嘅年青人实力认真麻麻，呢场难逃一劫，捧让球主胜。
（Now 643、有线603及604周三凌晨4时直播）
上轮欧联作客挑战祖云达斯嘅曼联，喺先落后嘅情况下，最终靠马达嘅精妙罚球，同对手后卫邦路斯嘅乌龙波，最终以2比1反胜，重燃球队斗志。随住比利时箭头卢卡古伤愈复出，今仗红魔前线进攻套路又再多几瓣，搭住近期愈战愈勇嘅法国攻击手安东尼马迪尔，同上仗联赛因为要坐波监而抖足全场嘅进攻型左闸劳基梳尔，红魔绝对有足够火力，喺主场重演首循环3比0大胜年青人嘅好戏。
年青人中场悍将停赛
今季由附加赛晋级嘅瑞士球队年青人，纵使喺本土联赛威到爆，不过去到欧联正赛面对欧洲顶级劲旅，实力差距即刻表露无遗，小组赛至今未赢过波之馀，2次作客都输对手2球或以上，加上悍将辛洛高呢场被罚停赛，令年青人失去主力中场屏障，呢场后防线随时要直接面对红魔嘅衝击，宁愿捧让球主胜好过。
