皇马访罗马食私房菜
今晚欧联G组爆发榜首大战，由「2哥」罗马主场迎战「1哥」皇家马德里。唔好以为今仗和波会携手出线，如果皇马失分，随时有出线危机，今仗造访「私房菜」罗马唔会留手，博赢波提早获首名出线，皇马小让平半拣上盘。
（有线661及601台周三凌晨4时直播）
现时两军同得9分，就算今场和波亦未能携手晋级，因为「3哥」莫斯科中央陆军落后5分，若佢的今轮赢波而皇马失分，下轮两军交锋则成为生死斗，如果咁唔好彩皇马再输，就与中央陆军同得10分，会因对赛成绩较差被骑住，当然仲要视乎罗马对柏辛域陀尼亚嘅赛果，好似讲得太远，一句到尾，皇马若果失分，即有出局危机，梗系赢左先喇。
「银河舰队」自苏拿利中途接手后，即连赢4场，可见苏帅成功整顿内部问题，令众将同心为他卖命，虽然日前联赛惨吞伊巴3蛋，但佢早啲知道防守问题所在，好过喺欧联关键战先知喇，以便作出调整。早前陷入球荒嘅箭头宾施马，近5场入4粒，快翼加里夫巴利亦伤愈复出，攻力复整。
格食格往绩4连胜
罗马虽然近况尚可，但仍未改一贯攻强守弱嘅陋习，连续5场有失波，难挡火力全开嘅皇马。况且「银河舰队」近年专剋罗马，两军近4次交手，皇马赢晒仅失1球，格食格下可反客为主，上盘有计。
