18场不败唔赦热刺
今晚英超上演两场打吡大战，其中北伦敦打吡阿仙奴主场对热刺；两队系世仇唔使多讲，虽然近年热刺排名已赶过「兵工厂」，但对赛上阿仙奴仍食住对手，保住北伦敦一哥呢块金漆招牌，今晚主场出战开出平手盘，乐比认为阿仙奴可看高一线。
（Now 621周日晚10时05分直播）
阿仙奴视热刺为死敌，故每次碰头都分外落力，当中近25次主场对热刺仅输1场，同时兵工厂亦系连累热刺于英超历史上失分最多嘅对手。虽则话热刺近年进步神速，不过之前对住云格领军后期嘅阿仙奴，依然佔唔到任何甜头，上季喺酋长球场便以0比2落败。
虽然话数据系用嚟打破，不过阿仙奴应付呢场波明显花左唔少心机，最明显就系上周中欧霸收起晒成队正选，派尼基迪亚、韦洛克及史密夫路维等新仔落场吸取经验，摆到明留力踢今场硬仗，难得系佢的作客乌克兰依然能够3球淨胜对手，将不败场次延续至18场，取得14胜4和，阿仙奴已经好耐冇试过咁威，连所谓嘅「黑色十一月」魔咒都克服埋，可见艾美利时代嘅阿仙奴比过往进步不少。
打吡战多入波要埋大盘
当然，热刺近期嘅气势亦相当强，联赛同盃赛加埋已6连胜，不过佢的近期接连硬仗，继上周联赛硬撼车路士后，上周中欧联生死战又斗完国米，连踢3场硬野绝对唔易应付，相比起留晒力嘅阿仙奴确实有啲输蚀。
虽然乐比今场睇好阿仙奴，但有一点值得留意，阿仙奴近22次主场对热刺都有入波，而热刺亦有一位阿仙奴剋星，就系近7次联赛对兵工厂射入7球嘅神锋哈利卡尼，所以乐比预期今场波有机开大盘，不妨向大波胆埋手。
