西伦敦近泰晤士河嘅两支英超名牌球队，今晚进行打吡战，就系车路士主场对富咸，至于夜少少仲有北伦敦打吡，由阿仙奴主场硬撼死敌热刺，一定打甩髀。
先讲头场西伦敦打吡，富咸虽然搵嚟老帅云尼亚里接手，上仗即赢修咸顿3比2止泻，但呢支包尾大幡仲有排执。至于前列分子车仔，岩岩喺欧霸分组赛以4比0大胜PAOK，一洗上轮联赛输畀热刺嘅颓风，为追赶前面嘅曼城、利物浦同热刺，绝对不容再失，相信今场可藉地利赢波。
今晚重头戏梗系北伦敦打吡，未计今轮赛事，「3哥」热刺只系领先「5哥」阿仙奴3分，得失球同为+12，可见大家实力半斤八両。阿仙奴今季改由西班牙籍教头艾美利执教，自头2场输波后，近18场正式赛事保持不败。热刺亦连赢6场，包括周中欧联击败国米，若果单计联赛，近8仗赢左7场，气势如虹，大家都咁弗，预计今仗「和」味浓。
