今晚早场史特加主场斗奥格斯堡，史特加新帅韦恩薛亚领军倒戈，佢喺奥格斯堡成名，曾带领奥堡杀入欧洲赛，但嚟到史特加似乎未执得掂队波，球队仍沦落榜尾，加上近季主场对奥格斯堡都冇本事入波，平手盘宁撑「奥堡」。
（on.cc东网周六晚10时30分直播）
韦恩薛亚喺奥格斯堡取得成功，不过嚟到史特加无法保持，史特加上月中国际赛休战期搵佢救亡，至今未见起色，除喺南部打吡赢过另一弱旅纽伦堡外，其馀4仗全败兼零入球，上轮作客就吞利华古逊两蛋，表现乏善可陈，连前国脚箭头马里奥高美斯都话对自己今时今日嘅战斗能力有怀疑。史特加今季踢左12轮联赛除左只得8分外，合共只入8球亦系德甲火力最弱球队，佢的近3次主场对奥格斯堡都入唔到波，短时间都几难翻身。
「奥堡」首席射手强势复出
奥格斯堡近况唔算肋，近3轮只得1分，但球员抢拼积极，阵上观感唔差。今仗佢的最大喜讯系首席射手艾费特芬保加臣伤愈复出，呢位冰岛箭头今季受伤患困扰，12轮联赛只曾上阵6次，但已经有7个入球，并3度当选球队最佳球员，绝对系「奥堡」取分之匙，事实上「奥堡」至今12轮联赛入左20粒，系球会史上喺德甲同期入波最多一季，今晚强阵到访史特加可坐和望赢。
