万众期待嘅英超「双红会」今晚上演，利物浦坐镇晏菲路主场斗死敌曼联。「红军」今季勇不可当，未计寻晚赛果力压曼城暂列榜首，亦系目前英超唯一不败球队，不过莫连奴嘅「大巴」战术对亲利物浦都收效，曼联受让一球高水1.97倍够晒吸引，信多次「莫一招」撑下盘！（Now 621周一凌晨零时直播）
今时今日如果话利物浦高曼联半班波，无论你系利迷定曼迷相信都会同意。事实上数据证明一切，利物浦除左喺积分榜领先曼联多达16分，今场主Ｗ热到得1.44倍，系英超历来「双红会」最热一次，就算睇番场内表现，近几次对赛无论控球率，射门次数都远远喺曼联之上。不过值得留意嘅系，曼联自莫连奴上任以来，联赛4次对利物浦保持1胜3和不败，即使畀你攻到慌，其中3场控球率得番3成几都好，到最后佢架「大巴」都系顶得住。
当然，乐比绝对认同久守必失呢个道理，尤其曼联防守根本谈唔上稳健，今季已失左26球，系「红军」4倍有多，况且「红魔」防线上伤兵众多，好似马高斯卢祖、劳基梳尔、达洛治、达美安及域陀连迪路夫等人都有伤，不过佢的放弃控球权之馀，唔系完全冇还击之力，今季喺车路士、阿仙奴及曼城等强队身上都取得入球，绝对唔系偶然，利物浦今场要赢两粒先赢盘并唔吸引，如果真系对「红军」有信心嘅话，倒不如买大盘更实际，皆因曼联今季所有赛事11场作客，仅得1场开唔到大。
红军欧联搏尽体力较输蚀
「红军」今季Big 6交手成绩唔算突出，对曼城、阿仙奴同车路士都系打和，而曼联比利物浦其中一个优势系上周中欧联收起左迪基亚同尼曼查马迪两名主力，利物浦则喺生死战搏尽险胜拿玻里1比0，消耗唔少体力。曼联今场心态明显系守和1分都收货，以莫连奴嘅往绩唔难做到。
