今晚英超重头戏梗系压轴尾场嘅「双红会」。以往呢类死敌对碰必定打甩髀，所有数据都可以掟埋一边唔使理，不过今时今日两队明显有高低，唔可以再用上述思维去睇呢场大战。
先讲利物浦，唔单止有地利，岩岩周中欧联淘汰拿玻里晋级16强，士气大振，其中贵价门神艾利臣比加屡救险球，尤其临完场前嗰球非常关键，再次证明一位超级门神，可协助球队由输变和、由和变赢，甚至由出局变出线。连同荷兰中坚华基尔云迪克喺后防一柱擎天，可见主帅高普独具慧眼。佢亦令后备球员有随时候命嘅飢渴感，好似梳顿沙基利、史杜列治及奥历治等副选，每逢落场都交到货，可见高普深得麾下爱戴及信任。
相反「寸王」莫连奴近年执教皇马、车仔以至依家嘅曼联，经常搞到「家嘈屋闭」，不断批评麾下球员，内部士气低落，众将唔落力成绩点会好呢？失去对更衣室嘅控制力，此乃领队兵家大忌。「寸王」入主红魔后，单系睇佢高价签入嘅保罗普巴、卢卡古及阿历斯山齐士，明显眼光独「倒」，论名气人脚属Big 4，但个个冇料到，难怪联赛被踢出前5。加上「寸王」过于保守嘅战术，有抑压球员发挥之嫌，绝对责无旁贷。今晚主队明显秤先啲，曼联想抢分机会只得两个──渺茫同冇机会！
