曼联嘅莫连奴时代正式划上句号，好多球迷即刻「买定花生」，睇吓曼联会继续沉沦定强势反弹，好在曼联变天后嘅第1场只系作客「Big 6点心」卡迪夫城，正好成为「娃娃脸杀手」苏斯克查嘅造势大会，乐比认为曼联今场赢波冇问题，让一球上盘坐和望赢！
（Now 621周日凌晨1时30分直播）
莫连奴摆脱唔到「莫3季」魔咒，执教曼联第3季就拜拜，最惨系今次连球员都唔撑，普巴更疑似出Po揶俞，可以话英名尽丧。无可否认莫连奴过往系一名极优秀嘅领队，可惜适应唔到时代嘅变迁，又过分留恋昔日风光，搞到近年神憎鬼厌。其实由执教皇马时期开始，到第2次领军车路士，佢已经畀人技穷感觉，皆因球圈生态变得太快，球坛愈嚟愈强弱悬殊，单凭一招「泊大巴」难以取得成功，单调呆板嘅战术、保守嘅踢法系「寸王」嘅死症。
崇尚进攻丧抢冧球迷
事实上莫连奴由风光少帅变成落泊中佬，佢嗰种高压治军手法已难以获得认同，以往同泰利、林柏特及史奈达等主将揽头揽颈，但由C朗开始、到夏萨特、普巴，佢同队中主将都反面，驾驭唔到阵中球星注定失败。不过人都走左无谓再鞭尸，应着眼睇吓看守领队苏斯克查能否起死回生。45岁嘅苏斯克查喺曼联成名，年纪唔大之馀又有执教经验，佢比「寸王」优势之处系人缘赢成条街，同球员关系融洽，呢方面相信可满足到保罗普巴呢位大帝，其他球员亦会走多一步，而且佢亦崇尚进攻足球，符合现今足球趋势及球迷期望。
卡城正宗「Big 6点心」
最难得曼联今仗对手系弱旅卡迪夫城，虽然「卡城」最近主场3连胜气势唔曳，但人脚始终属降班料子，早前「帛金波」李斯特城亦喺万众期待下作客赢波，可见呢队波系帮到手，更何况「苏B」教过卡迪夫城，收风备战点都有帮助，加上「卡城」之前5仗对Big 6全败兼劲失17粒，一于撑曼联换帅后可一扫乌风。
