岩岩踏入2019年，笔者先喺度祝各位读者新年快乐。话咁快圣诞新年快车嚟到尾声，亦系好戏在后头，分别系今晚纽卡素对曼联，以及听晚榜首大战─曼城硬撼利物浦，认真精彩。
近期英超热门话题，梗系曼联在苏斯克查上任后全面复甦，连赢3场士气大振，当然依家去评论「苏B」系咪咁有料到，亦言之尚早，但佢带领红魔打出久违了嘅攻势足球，淨系呢点已经赢尽民心，造访纽卡素应可乘胜追击。另一支红衣球队利物浦，更加得人惊，自从去年12月头打吡战小胜爱华顿，到欧联击退拿玻里涉险过关，跟住喺年尾最后一仗反胜阿仙奴5比1，各项赛事连赢8场，现时士气、信心爆晒棚。
天助利物浦赢埋曼城
踢波唔单止系讲实力，气势亦好紧要，因为连场报捷下，通常会愈踢愈顺，顺起上嚟嗰阵，甚至连好运都会跟住你，好似上仗大胜阿仙奴之役，红军两次获得12码，相反阿仙奴球员亦有两次喺禁区被侵犯，但都未获判极刑，可见红军连运都赢埋。虽然曼城绝非善男信女，上仗亦击败修咸顿止血，但之前一不小心两连败，被甩开7分，真系连个天都帮埋利物浦，食住个势今仗赢埋唔奇，不妨将红魔客胜同红军客胜，整条过关二串三。
