近10季英超能喺圣诞新年快车后排榜首，就有7队由头赢到尾最终封王，坚好脚头，但凡事都有例外，阿仙奴（2次）及利物浦则成为剩番嗰3季嘅不幸者。
「肥宾」轮换制招恶果
先讲利物浦，佢的喺2008-09年度球季初段即带出，当时主帅宾尼迪斯最锺意玩轮换制，呢招系可确保球员整季嘅体能储备，「肥宾」亦唔敢乱郁谢拉特、费兰度托利斯等主力，但红军本身板櫈深度唔够，为轮换而轮换，将过别弗爆主力收起，而后备兵又唔够班，直接影响成绩，尤其系对韦根、史笃城、侯城、富咸等弱旅失分成关键。好衰唔衰，「肥宾」季中忽然同费格逊打心理战，拿出一叠「罪状」称曼联有被偏帮之嫌，反而激发红魔从后赶上。
至于阿仙奴喺2013-14年、2015-16年两度失诸交臂，查实系有迹可寻。兵工厂喺老帅云格带领下，执教后期每季都有个循环：季初状态特醒、之后伤兵愈来愈多、踏入2月联赛及欧联多线作战下崩溃、最终只能保住前4。最致命系黑色2月，阿仙奴例牌先于欧联16强出局，信心受挫影响埋联赛，喺2及3月嘅联赛踢到失晒魂，正系「云爷爷」不自量力，个个盃都想捧，落得「竹篮打水一场空」嘅结局。而嗰两季阿仙奴，喺中后段伤兵成箩，亦系甩辘嘅关键。
