至于早场奥格斯堡迎战杜塞尔多夫，我的东网都安排左英语旁述直播，呢场波牌面睇戏码唔算劲，不过双方都声言摆大头抢攻博攞晒3分，两军都有卡士唔错嘅攻击手，今场推介中位数2.5球大盘。
（on.cc东网周六晚10时30分直播）
两军分列联赛榜下游嘅14同15位，奥格斯堡开季成绩唔曳，不过到左去年底因为伤兵问题严重开始跌Watt，最近8场联赛3和5负未赢过，排名急剧插水，好在经过歇冬期伤兵问题得到一定改善，虽然守将史迪菲尼迪斯、中场卡奥比同具滋哲继续养伤同去左踢亚洲盃，防中兰尼基迪拉停赛，但前线阵容复整，王牌射手艾费特芬保加臣得到基哥列舒治同安达夏恩支援，主场遇弱旅誓全力抢攻，有决心重返胜轨。
杜基斯治加操博开斋
原本被视为降班胆嘅杜塞尔多夫，上半季成为神奇球队，歇冬前3连胜震惊德甲，攻击手卢克巴基奥同宾尼图拉文更轮流爆发，可惜歇冬期爆出主席缩骨唔肯同教练芬基续约风波，搞到球迷起革命，依家球会高层虽然同芬基倾掂数，话如果成功护级佢将会自动续约多一季，但球队形象同士气多少都受到影响。
不过，季前球队嘅最贵收购杜基斯治喺歇冬期自我加操，表现大受好评，呢位上季德乙神射手，今季上半季喺德甲竟然未开到斋，认真尴尬，会方同佢都声言要喺下半季重拾射门鞋，今晚场波大家一于睇实佢啦！
