至于今晚亚洲盃8强压轴尾场，由东道主阿联酋硬撼上届盟主澳洲。阿联酋今届进攻唔多掂档，唔想重蹈上届4强交手输波嘅覆辙，今场唔敢冒进，适逢跌晒Watt嘅「袋鼠国」，初段随时玩拉布，半场和值博。
（Now 671、有线652及612台周六凌晨零时直播）
双方哑火势玩拉布
翻查纪录，双方喺上届4强交过手，当时阿联酋以0比2输畀东道主澳洲，今场掉转轮到阿联酋做主办国，始终上届碰头落败，难免有戒心，今场必定小心为上。而且头号球星奥马鸭都拉文因伤落选，对阿联酋进攻打击极大，连一向进攻大过天嘅主帅沙哲朗尼都冇晒计，虽然杀入8强，但今届4场法定时间仅得1胜3和，包括上场16强几经辛苦，喺加时先险胜弱旅吉尔吉斯3比2，表现令人失望，其中3场开半场和，进攻唔掂惟有踢得保守啲。
卫冕嘅澳洲今届跌晒Watt，分组赛首轮爆大冷输畀约旦，之后连胜2场出线，但喺16强面对实力强啲嘅乌兹别克，法定时间连加时均互交白卷，最终仅靠互射12码先淘汰对手，幸运成分居多。喺一代射手卡希尔退出国家队、中场阿伦穆尔因伤落选后，「袋鼠国」嘅进攻板斧真系唔多，面对求稳嘅阿联酋，初段大家斗玩拉布唔奇，半场和更好路。
