美斯宾施马斗射术
今日大年初二开年，西盃4强首回合即爆发国家打吡，巴塞隆拿主场火併宿敌皇家马德里。巴塞王牌美斯嘅伤势冇乜大碍，预计今仗可披甲，但「银河舰队」箭头宾施马脚风超顺，两大射手正面交锋，随时合演入球骚，中位数3/3.5球大盘有买趁早。
（周四凌晨4时开赛）
巴塞虽然一向靠美斯搵食，今季佢一唔出场就出事，西盃8强首回合收起呢位队长，作客即吞西维尔两蛋，次回合出番美斯返主场狂数6比1晋级，日前联赛对华伦西亚，又系靠美斯省两粒先追和2比2，而佢嗰场仲负伤捱到尾。美斯仍需要接受检查才确认伤势，但据报佢觉得唔太严重，相信今仗可上阵，依家「地上最强」有佢同冇佢差好远，呢位球王今季喺各项赛事轰29粒兼有14次助攻，搞到主帅华尔维迪唔敢乱咁轮换，而且今仗系国家打吡，美斯一定想顶硬上。
另一边厢，皇马射手宾施马同样弗爆，佢上仗赢艾拉维斯又入1粒，连续4场有士哥，合共入左6球，如果佢今仗再有进帐，就会追平自己在皇马连续5场入波嘅最佳纪录。宾施马表现回勇，有指佢除左随球队训练外，亦请左一位体能训练师到佢屋企帮佢加练，令呢位法国箭头冇再出现超重，少左受伤，状态更加稳定，实同美斯鍊过。
国家打吡必定去尽
每逢国家打吡，两军为争胜例必踢到飞沙劈石，总计各项赛事在内，巴塞与皇马近7次交手一共合力炮製29球，当中5次总入球达4球或以上，相信今仗实多波入，就算中位数调至3/3.5球照拣大盘。
