今晚欧洲足球好波浪接浪，英格兰联赛盃决赛——车路士对曼城。记得我喺4年前亦曾赴英睇决赛，咁啱都有车仔份，当年佢哋喺摩连奴麾下，以2比0轻取热刺，势估唔到经历4载，车仔已用咗3名领队，从不断捧盃到风雨飘摇，如今撞正所向披靡嘅曼城，好难乐观。
讲到最瞩目之战，必属英超双红会——曼联坐镇奥脱福迎战死敌利物浦。两军教头苏斯克查同高普嘅对决，犹如孔明斗周瑜，关键在于谁先洞悉对手策略，採取针对性部署。与接手曼联冇耐嘅「苏B」唔同，高普嘅高度压迫加快速反击战术，早已成为利物浦标志，前线3把利刀更令对手闻风丧胆。
不过，正所谓「你有张良计、我有过牆梯」，好似上周中欧联16强首回合，防中出身嘅拜仁主帅尼高高华，大打中场逼抢，派出巴斯克悍将查维马天尼斯在4人防线前做扫荡，加上众将一失控球权即就地反抢，成功守和红军0比0。到底「苏B」会沿用抢攻打法，抑或先巩固防守，将会成为锺意鑽研战术嘅球迷一大看点。
