今晚温布莱球场上演英格兰联赛盃决赛，由车路士对曼城。车路士正面对近年最大危机，但班主、领队、球员以至球迷却未能团结一致，未踢个势已输咗大截。反观曼城领队哥迪奥拿捧盃经验丰富，相信今次可继两星期前再次力压车仔，曼城让半一，乐比撑上盘。
（周一凌晨零时30分开赛、马会网上文字直播）
车路士自班主阿布拉莫域16年前入主以来，经历过无数嘅危机同低潮，但从来冇今次咁严重，领队唔啱用好閒，反正隔一两季换领队係平常事，最大危机係阿布对搞波嘅热情已逐渐冷却，由于英俄关係紧张，令阿布喺英国处处受到掣肘，近日更不断传出卖盘嘅消息，所以国际足协禁止车仔喺未来两个转会窗转会操作，其实影响真係唔大，因为车仔本身已唔多想买人，最多咪收番一大批借将自用。
沙利一成不变最攞命
今季先初嚟甫到嘅领队沙利，季初本来被寄予厚望，可惜佢嘅「沙利球」未能在英超发扬光大，佢多次埋怨球员唔能够充分理解佢嘅意念，更直言夏萨特欠缺领袖魅力，多番惹火言论都令到更衣室关係紧张。不过沙利嘅致命伤係太坚持自己一套，而且永远冇Plan B，即使两周前对曼城半场已输紧4球，仍然唔见佢有咩对策，结果埋单输够6粒。係人都知佢换人永远係位换位，今季已经20次由巴克里入替高华锡，再唔係就基奥特换希古恩或柏度换韦利安咁，完全一成不变，车路士今季对Big6球队成绩差劣，尤其係离开主场已4连败，一球波都入唔到，可见其他强队已睇穿晒车仔嘅战术。
曼城今季对Big6成绩突出，共6胜1和1负，哥迪奥拿更可以话係捧盃之王，职业生涯已赢得20个奖盃，淘汰赛更係经验丰富，11次入决赛赢咗10次，唯一一次失利係2011年西班牙盃决赛，反观沙利教咗咁多年波，係首次杀入盃赛决赛，捧盃经验係零，从各方面去分析，车仔今场都好难可扭转劣势。
