周日晚上英超「双红会」大战，曼联主场挑战「2哥」利物浦。想喺曼城手上抢番榜首位置嘅「红军」，近期联赛频频失分状态认真麻麻，呢场仲要作客面对魔性返晒嚟嘅曼联，随时再有闪失，今场客队利物浦仲要让平半，必吼曼联下盘。
（Now 621周日晚上10时05分直播）
经历联赛上半程灾难般嘅表现之后，相信唔少红魔球迷已经对爱队战绩唔再抱有太大期望，势估唔到自从名宿苏斯克查接手球队之后，魔性即时返晒嚟，尤其喺本土赛事战绩堪称所向无敌，联赛连英足盃近12场比赛豪取11胜1和，其中就先后击败热刺、阿仙奴同车路士三支Big 6，面对另一劲旅利物浦一样冇有怕。
同时，曼联同利物浦嘅敌视程度，不嬲比起同市死敌曼城有过之而无不及，之前摩连奴就係作客以1比3输畀利物浦后落镬，苏斯克查作为「红魔人」，深知「双红会」嘅意义，呢场肯定唔会留手，如果「苏B」可以带队赢到「红军」，绝对会为自己坐正曼联帅位赢得唔少筹码。
利物浦撼完拜仁体力输蚀
利物浦暂时同榜首曼城同分，但踢少1场，仅以得失球差屈居第2位，呢场只要有分落袋即可抢番1哥位置，不过红军啱啱周中喺欧联同拜仁慕尼黑上演恶战，球员体能肯定要比曼联输蚀。况且红军近期作客表现跌Watt，近4仗作客取1胜1和2负。再加上球队最后一次喺曼联主场奥脱福赢波，已经要数番去2014年，之后5次作客仅取2和3负，呢场再临凶地睇怕都好难攞到甜头，曼联主场受让平半，冇理由唔捧下盘。
