唔想揽炒 但求吊命
今季英超最后一场Big6大战，曼联主场对车路士。英超前4近期竞争激烈，皆因几支竞逐前4球队轮流失分，令形势更加紧凑。曼联自苏斯克查续约后气势全失，由天堂跌落地狱，至于车路士今季作客前列亦成绩差劣，两队均有隐忧，乐比认为今场最大机会係和局，两队吊住条命留番最后两轮决定命运。
（Now 621周日晚11时30分直播）
曼联自苏斯克查接手后，一度创下17战14胜2和1负骄人战绩，不过自苏B正式上位后，曼联无以为继，近9仗输咗7场，情况仲严重过季初摩连奴执教之时，归根究柢，都係球员质素未去到顶级，战术上亦追赶唔到现时潮流，所以蜜月期一过，道气洩咗又再打回原形，如果唔大换血及改革，实在难以再次称霸英超。
讲呢啲实在太长远，现时排第6嘅曼联欧联席位相当不妙，分别落后第4嘅车路士3分及第5嘅阿仙奴2分，不过曼联最大嘅优势就係唔使打欧洲赛，而且馀下两仗赛事相当易打，分别係下场对包尾嘅哈特斯菲尔德，同埋最后一轮对随时已降班嘅卡迪夫城，照计曼联有把握攞晒呢6分，反观车仔同阿仙奴要搏欧霸之馀，剩番两场亦较难啃，故今场和波对曼联嚟讲唔係太差结果。
车路士作客遇强曳爆
至于作客嘅车路士更加心繫欧霸，毕竟夺冠除咗可以帮领队沙利拎到职业生涯首项锦标之外，更可以取得明年欧联入场券，论机会同成效，点都好过搏联赛拎第4名。
何况车仔今季联赛作客强队成绩实在太差，作客联赛积分榜上半版嘅球队，7场输足6场，唯一赢过嘅係屈福特，故今仗面对状态低沉嘅曼联，真係全无把握可言，和波保持住呢3分嘅距离，相信都係沙利可以接受嘅战果，两队今场都唔想输嘅情况下，有机会和波收场，3.35倍博得过。
