话咁快欧霸分组赛今晚开打，其中F组焦点战，上届亚军阿仙奴作客法兰克福。阿仙奴近期表现坚飘忽，主帅艾美利似乎会趁欧霸作出轮换，效果难料，法兰克福于主场出战欧霸特醒，仲有得受让，让球主胜有计。（myTV Gold 303、Now 643、有线656及616台周五凌晨零时55分直播）
艾美利随时又玩变阵
阿仙奴今季未改飘忽特性，尤其係后防坚不稳，连续4仗有失波，包括上仗领先2粒之下，竟然畀屈福特逼和2比2，与守将连番犯错有关，连利物浦名宿兼讲波佬加历查都忍唔住，批评阿仙奴后防总会出现一啲莫名其妙嘅失误，同前几年嘅利物浦好相似，就算领先紧都唔一定可保住胜果，我对呢点非常认同。
由于依家势色唔对，我预计「善变」嘅主帅艾美利，会藉住欧霸试试变阵，一来畀频频甩辘嘅大衞雷斯同柏柏斯达夫普路斯抖抖，二来顺便考察吓伤愈小将洛贺丁嘅状态。轮换未必係坏事，但我觉得部分球员夹得较少，对整体发挥有一定影响，加上作客要让波唔多划算。反过来说，上届欧霸杀入4强嘅法兰克福，儘管人脚大变，但开季后联赛2场胜仗都係来自主场，有地利不容忽视，何况佢哋由上届开始，近10次欧霸主场出击未输过，受让必捧让球主胜。
