前锋哑火以守代攻
周六凌晨西甲重头戏，西维尔主场同马德里体育会高手过招。踢法稳守至上嘅马体会，近期有进攻主力祖奥菲历斯因伤倦勤，前场进攻乏力嘅问题愈趋严重，面对防守表现大有改进嘅西维尔，马体会一班前锋发挥空间有限，两军开局随时陷入胶着，半场和值得捧场。
（Now 632周日凌晨1时30分直播）
铁血防守向来都係马体会嘅看家本领，今季喺主帅施蒙尼调教下，「床单军团」嘅后防即使经历巨大人脚变动，整体稳健表现依然不变，联赛至今仅失过6球，成功将「西甲最佳防守」嘅金漆招牌省到靓一靓。不过施蒙尼近年亦积极求变，致力帮助球队改善进攻效率，今季仲落重本引入极具创造力嘅祖奥菲历斯，可惜呢位葡萄牙小将近期受伤要抖一排，冇咗佢喺中场突破同派牌，等于断晒艾华路莫拉达同迪亚高哥斯达两大射手嘅米路。而且马体会今季开局经常同对手踢「闷波」，近6场作客有5次半场同对手打和，比赛早段慢热嘅情况相信会持续。
西维尔踢法留前斗后
西维尔今季防守表现亦有明显改进，近2仗主场全胜之馀，亦成功保住清白身。可惜同马体会一样，西维尔阵中同样缺少一位高产射手抢士哥，新加盟嘅两位前锋卢克迪庄同查维亚靴南迪斯，今季各自喺联赛都只係入到1球，效率实在麻麻。更何况西维尔今季5次主场出击，上半场都同对手斗到难分难解，踢法留前斗后，今场同强敌马体会对撼，料两队开局都难佔明显优势，半场和要得过。
