今日中午日职头场之一，神户胜利船主场迎战仙台维加泰。虽然胜利船今季唯一目标係争日皇盃，但由于4强战有排都未打，撞正弱旅兼私房菜维加泰，可寓赛于操，主胜值得捧场。
（有线604及603台周六中午12时直播）
胜利船坐拥恩尼斯达、韦拿、普多斯基、华美伦等球星，如今喺联赛只位居中游，其实都几肉酸，为咗争取下届亚冠盃入场券，赢日皇盃冠军係最有效捷径，为此之前部分联赛更特登收起主力。依家佢哋已杀入日皇盃4强，喺12月尾对清水心跳，仲有1个多月时间，冇理由咁快要留力啩，反而要藉联赛保持状态，同埋上周有日联盃决赛关係，令联赛轮空，为免「揼懒」身子，今仗主场出击唔会hea踢。
近5次交手维加泰未威过
其实维加泰与胜利船係同分排中游，暂时甩开降班区4分，连埋盃赛在内，近8仗赢得2场咁大把，状态认真麻麻，包括喺日皇盃畀乙组仔长崎成功丸踢出局，见到都唔开胃。何况胜利船係佢哋剋星，双方近5次交手，胜利船取得4胜1和，摆明格食格喇，主胜有买趁早。
