老辣daddy食住天真林仔
今晚英超话题之战，当然係睇热刺主场对车路士嘅两师徒对决。摩连奴同林柏特情同父子，唔少前车仔球员甚至球迷都称呼摩佬为「daddy」，不过两人执教风格迥异，摩连奴係典型功利主义者，为求赢波不择手段；而林伯则係叫好不叫座，有口碑却欠成绩。正所谓薑愈老愈辣，林伯喺爹哋面前都係变番「林仔」，热刺让平半捧上盘。
（Now 621及611周一凌晨零时30分直播）
车路士季初唔畀买人，重用新秀下却踢出悦目嘅足球，林伯自然被捧到上天，但叻极车仔依家都係排第四，而且近7仗仲输咗4场之多，坦白讲车仔嘅表现其实好唔稳定，只不过球迷对佢哋嘅期望降低咗，先至觉得车仔今季交到货。
林柏特领军4战Big 6输晒
无可否认车仔今季打起咗好多新星，包括谭美阿巴谦、美臣蒙特及汤姆利等「土炮」，但防线依然可以用恐怖嚟形容，今季只得3场联赛係保持清白之身，同以往摩佬执教嘅车仔时崇尚防守嘅风格，可谓背道而驰。当摩佬今季仲係做紧讲波佬嘅时候，甚至用「天真」嚟形容林伯嘅战术。事实上，车仔今季4战Big 6球队全败，已充分反映出佢哋嘅弱点，就係防守时压迫不足，畀对手太多空间，同埋对胜利嘅渴求同执着唔够，输波时一句虽败犹荣就可以安心回家。后生仔始终係后生仔，无论领队同球员都真係仍幼嫩，对住老谋深算嘅摩连奴等同送羊入虎口。
摩佬充实教练团与时并进
摩连奴接替普捷天奴执教热刺后，球队成绩有明显改善，最难得係火力强劲，7场波入咗19球，证明摩佬真係有自我反省，唔再单靠泊大巴赢天下，最大转变係搵嚟年仅30岁嘅沙卡文度做副手，呢位学院派新星冇做过职业球员，唔係红裤子出身，但喺战术分析同情报收集上却畀到摩连奴好多意见，可见摩佬係有与时并进，唔再眷恋昔日嘅光辉岁月。
最重要係热刺球员喺摩连奴嚟到后见到希望，队波唔再係陪跑分子或者永远二奶命，而係有能力争标嘅球队，主将留队同续约嘅决心大咗，自然解决咗早前嘅信心危机，乐比相信热刺今场可赢波取代车仔嘅4哥之位。
