热刺踏入新一年坚係当黑，唔单止喺元旦日联赛输畀修咸顿，射手哈利卡尼亦喺嗰场伤出，初时估计需要抖4至6周，但根据热刺官方最新透露，证实「哈神」左脚大腿腿筋撕裂，伤势比预期严重，暂时未知几时可以复出，令人担心佢可能会缺席今季馀下赛事，提早收咧。热刺未来1个月将有唔少大战，包括英超对利物浦及曼城，下个月欧联16强亦会开打，如果哈利卡尼长抖，肯定打乱领队摩连奴嘅部署。
基斯甸艾历臣势投国米
祸不单行嘅係，热刺中场基斯甸艾历臣离队心意已决，呢位丹麦国脚将于今夏约满，但佢一直拒绝续约，若果热刺唔想人财两空，今个月就要放人，据丹麦媒体《Ekstra Bladet》声称国米比较有诚意，已经开出2,000万镑转会费，加上热刺唔想放畀曼联等竞争对手，于是更倾向接受国米报价。
至于今晚英格兰足总盃第3圈，热刺作客由旧将活基治执教嘅英冠球队米杜士堡。热刺除咗哈利卡尼之外，门将洛里斯、左闸丹尼路斯亦因伤倦勤，米堡近4仗赢晒之馀，单计主场亦豪取4连胜，唔怕天残地缺嘅热刺，主场出击仲受让半一，下盘有买趁早。
（myTV Gold 307周日晚10时01分直播）
