阿迪达挑战宗师比尔沙
今晚英格兰足总盃第3圈独脚戏，阿仙奴主场迎战列斯联。「兵工厂」阿仙奴新帅阿迪达带嚟嘅「6秒法则」，重新激活球队，就算遇上一代宗师、列斯联老帅比尔沙亦冇有怕，何况兵工厂一向食住呢支英冠「1哥」，加上主场之利有力赢波晋级，让半一照捧上盘。
（无綫85台及myTV Gold 308周二凌晨3时56分直播）
今仗最大睇头，必属两代崇尚逼抢嘅教头、阿迪达与比尔沙嘅大斗法，64岁嘅比尔沙近年执教智利国家队、毕尔包、马赛、里尔及列斯联等唔同级别球队，其独特嘅风格，甚至吸引咗名帅哥迪奥拿慕名求教，宗师地位毋庸置疑。不过，经过上季大好形势仍未能升班，列斯联今季头号目标依然係重返英超，查实佢哋近5仗仅1胜，状态麻麻，在兵源有限、升班大过天之下，比尔沙难免会避重就轻。
「6秒法则」初见成效
「兵工厂」新帅阿迪达师承哥迪奥拿，其风格亦略带比尔沙嘅影子，但佢带嚟新派嘅「6秒法则」，要求喺每次失去控球权后，附近球员要喺「黄金6秒」之内进行高压性反抢，其他队友就喺呢段时间部署防守，即使6秒内抢唔番个波，防线亦大致完成布防，大大减低对手打反击嘅机会。虽然「达哥」接手后3仗只得1胜1和1负，但从上仗轻取曼联2比0所见，球员已逐渐适应呢种打法，防守明显稳阵咗好多，就算今仗或收起奥斯尔、奥巴美扬等主力，重用活力十足嘅祖尔韦洛克、雷斯尼尔逊等小将，相信仍会收到奇效，何况近6次对列斯联取得5胜1和，摆明格食格，上盘不容错过。
