光辉兵疲恶唔出样
澳职周六安排两场比赛上演，刚喺周中出战亚冠盃嘅珀斯光辉及墨尔本胜利分途出击；头场光辉会喺中立场斗布里斯班狮吼，两军近期状态俱佳，狮吼连续5场上半场都冇失波，光辉经过周中激战回气需时，预计初段大家都攞唔到甜头，推介半场和。
（myTV Gold 302、Now 639、有线615及655台周六下午2时分直播）
狮吼近5场联赛赢4场，经已重返联赛前6名，对争夺季后赛入场券好大帮助。狮吼今季头10场联赛有7次半场落后，好在佢哋知错能改，近期喺比赛初段表现有明显改善，对上5场联赛换边前都冇失波，全部踢成0比0，强如榜首FC悉尼都咬佢哋唔入，相信狮吼今场会继续稳守为先，唔会同你急。
光辉近9场联赛7胜2和，状态大勇有过之而无不及，不过佢哋周中亚冠盃作客日职球队FC东京输0比1，士气、体力恐受影响，而且今季首循环交锋，光辉主场都赢唔到狮吼，只能打和1比1，往绩上冇优势，要抢得先机亦唔容易，既然狮吼近5场联赛全开半场和，不妨再追多次。
尾场胜利受让有计
至于尾场纽卡素喷射机主场对墨尔本胜利，两军现时分别排联赛榜尾2及尾3，表现可谓「难兄难弟」，喷射机近11场联赛只赢过包尾嘅中岸水手，而且佢哋係今季澳职失波最多球队，后防甩甩漏漏；胜利上场亚冠盃作客FC首尔输0比1，不过「烂船尚有三斤钉」，几位中前场好手托禾伦、纳博特及马高洛查士都有扭转战局嘅个人质素；睇番两军近6次交手，胜利喺法定时间攞到4胜1和1负，今场有得受让，下盘係信心之选。
（myTV Gold 302、Now 639、有线615及655台周六下午4时30分直播）
