今日下昼韩职尾场直播戏码，由FC江原主场硬撼FC首尔。虽然FC首尔係上季季军，但呢支「韩职红魔」靠食老本实力冇乜提升，尤其係正副门将都係神经刀，防线坚唔稳阵，撞上有前冇后嘅FC江原，随时癫凤斗狂龙实多波入，2.5球嘅入球大有买趁早。（无綫85台周日下午3时30分直播）
FC首尔凭极具感染力嘅「韩国摩连奴」崔龙洙领军，从2018年几乎降班，到上季取得季军兼亚冠盃入场券，不过缩皮情况未有改善，今季只买入金晋亚、韩赞熙、卡路士阿祖安奴等新兵，睇嚟要继续食老本，倚重奥斯马巴巴、高尧韩、朴主永等骨干。呢支传统劲旅上季凭快速突击攻入53球，不过失球达49粒，明显係攻强守弱，喺缺乏优质新援加盟下难有改善。
斗FC江原例多波入
另一边厢，FC江原上季杀入争标组并取得第6名，控球打法令人喜出望外，其中轰入10球嘅「90后」前锋金直勛，更当选上季韩职最佳年轻球员，主帅金秉秀功不可没。FC江上季攻入56球，仅次于冠、亚军嘅全北汽车及蔚山现代，比今场对手FC首尔更多，可惜竟失咗58粒，唔单止係争标组中失波最多球队，亦係前6名中唯一得失球差係负数嘅球队，踢法太过重攻轻守。加上双方近5次交手，合共炮製17个士哥，其中4场开3球或以上，斗攻格局势演入球骚，2.5球嘅大盘更加值博。
