今晚德乙上演榜首大战，「2哥」汉堡主场硬撼「1哥」比勒费尔德。双方上轮齐齐打和，但比军因其他劲敌失分而获益，将领先优势稍为拉开至7分，随时鬆懈，汉堡为保「直升」战意旺盛，少让平半可捧上盘。（myTV SUPER周日晚7时30分直播）
比勒费尔德战意鬆懈
比勒费尔德上轮大部分时间领先之下，竟喺补时失守遭奥斯纳贝克逼和，好彩原本排次席嘅史特加倒灶，反而将优势扩大，领先依家「2哥」汉堡7分，无论係争冠定前2嘅直接升班资格，都非常有利，难免会有所鬆懈。查实比军上场领先后一直想拖到完场，点知畀对手尾段嘅高空轰炸炸散，可谓咎由自取。何况众将状态认真麻麻，例如久伤初愈嘅阵中2号射手禾格斯森马，后备入替表现一般，而且右闸薛迪般拿累积5张黄牌，今场要坐波监，对防守有一定影响。
汉堡在上轮亦係临尾香，作客畀格雷特霍夫逼和2比2，幸好史特加倒灶输波，同分之下凭较佳得失球升上次席，总算喺争前2嘅直接升班席位抢得主动权。汉堡主客演出反差大，同客场脚软相比，佢哋喺自己地头出击零舍有信心，今季12场联赛主场取得9胜1和2负，包括大破史特加6比2，係今季德乙主场成绩第三佳球队，主场威力不容小觑，为保「直升」位战意必坚，上盘值得捧场。
